牛肉餅＠清真牛肉館

意外地有個機會跟S 晚飯，幸好早兩分鐘約他... 因此他的朋友就被迫要改期食飯．

諗左一陣去邊食，工作地點緣故，決定在最就近的九龍城落腳．搭5 號3分鐘都唔駛就到，方便！可惜係... 落雨．盡用我的摺傘，我和S 都要濕1/3邊身左右，但總好過冇．

見有人在出面等，幸好入面伙記招手示意入得去，搭住檯咁坐（其實一定要搭的，實在太多人）望望剪報，睇埋個餐牌，結果都係點了那幾樣鎮店之寶：

1) 牛肉餅－超正！新鮮整，好香，多汁，好味．但要小心燙口同埋整到件衫花埋.
2) 麻油雞－失望！同普通冷盤雞冇分別，肉質係唔錯的，之不過唔覺有麻油香．
3) 咖喱羊－好味！夠辣，羊肉入味．
4) 蔥油餅－一定要食！又係新?煎好，又脆又香，點咖喱食更好．

之後仲去左合成食糖水，S 被那些極懷舊的歌曲（for example: 舊歡如夢）嚇呆．記得呢間係同 A來過的糖水舖，但那時好似冇播歌的．

食下又傾下，今晚都過得幾愉快．

平均消費＝HKD70（晚飯）+20（糖水）

＠＠＠
清真牛肉館
九龍城龍崗道1號
2382 2822

潮州合成甜品
九龍城龍崗道9號地下
2383 3026

香草薑茶@Tea & Herb

這個星期六絕對稱得上係"偷得浮生半日閒"，雖然朝早要返工．

放工後特意來到早一天雜誌介紹的小茶店，第一次踏足於炮台山地鐵站，值得紀念．看地圖，還以為那條大彎路會花上十多分鐘走，怎料，不到五分鐘便看到"蜆殼街"路牌，沿著小路走進近符盡頭便到達．隱藏於大樓中，門面可真不太起眼．

就是這種精緻而像家的感覺，店內不是太多人，由二人檯轉到一個靠窗面向街的單檯位，獨佔一張小圓玻璃桌和小仙人掌．左面是一位閱讀中的女士，右面是一個家庭．

按照雜誌的推介，選擇了巴拿火腿低脂芝士三文治配香草薑茶．三文治比預期中好味道，麵包味道清淡，很鬆軟，與跟濃味的火腿和芝士是絕配！香草薑茶也很好，兩者香味平衡，沒有誰蓋過誰，還可以加蜜糖（小盒伴茶另上），清清甜甜．

一邊享用食物，一邊看<巴黎晃遊者>，這樣度過了一個半小時．茶將用畢，很嗜甜，於是再來一個Blueberries cheesecake．味道一般，質感比平時食的較鬆化，不過，餅面的一片半透明凝膠就有點怪怪的，不要也罷．

實在是一個悠閒的星期六下午，愉快的兩小時就這樣給消磨．

平均消費＝HKD40/person

@@@
Tea & Herb
炮台山蜆殼街6-16號寶榮大廈地下B舖
2806 8418

蜜川雞+椒鹽玉子豆腐＠川居

出左地鐵站，走到街上，望望招牌，點解有兩個都叫"川居雲南風味"？好似得一間... 正在猶豫之際，E記得門牌號碼係113，再睇睇門面，都係113那間對路一點，所以決定過馬路入去．

坐底諗食乜之餘，望望張墊檯紙，原來兩間都係真的，的而且確有兩間舖．我和E相看而笑...

最後點了這裡出名的蜜川雞，椒鹽玉子豆腐，排骨米線，拼盆，再來兩杯熱檸樂加薑，相信這飲品不是個個地方都有得飲．味道似淨檸樂多d，薑味好輕．蜜川雞稍為甜一點，不過加左蜜糖整的多數都係咁．玉子豆腐好好食，炸得鬆化而內裡玉子豆腐好滑，不容錯過！米線質感很好，排骨不過不失．如果好似我和想試多幾樣小食同埋冇頭緒揀定一樣，叫拼盆就最好不過．

舖頭不是很大，到七點幾開始要等位，早d開始食就可以慢慢品嚐美食．

平均消費＝HKD40/person

@@@
川居雲南風味米線專門店
旺角花園街113 號地下
2789 2223

清湯牛腩伊麵@九記牛腩

貫徹我和E的慳食美味的攻略，繼續按圖索驥（這次真的是按圖，係拿著地圖和地址搵間舖頭係邊，比遊客更似遊客，哈~）．可惜，還是帶E走了一個大圈，走對了大路又先錯過了小路轉彎位... 幸好E大人有大量，沒有黑面．

遠遠望到"九記牛腩"這四個大字，不枉我和E爬樓梯至氣喘．坐低無耐，伙記問："仲有冇要叫走的東西？"起初很奇怪點解會咁問，後來才知道，原來這店於7:15pm-8:30pm係會暫時停業作清潔，8:30pm才開夜巿．臨走前才發現，應該在我們入來不久，伙記已放了一張摺椅，上面有個牌寫住"8:30pm重新營業".

講番野食，店名都咁叫，一定非食牛腩不可．很少地方會有湯伊麵的，不難吸引我的注意，而E選擇食米粉．牛腩味道純正，略嫌質感"鞋"左些少．伊麵吸湯速度驚人，不過對於向來鍾意食發脹麵條的我，這正合我意！

呢一餐唯一的美中不足，係我們來得不合時，感覺要趕快食完交場咁，那杯鴛鴦我係半飲半倒咁灌落肚，食完野行左成個鐘頭仲係好飽咁．原本想食飯後甜品的念頭一掃而空... 很少可能夠8點前食完晚飯，還可以輕輕鬆鬆地由 Landmark 逛到IFC，跟E有著說不盡的話題．

原來很喜歡這種"巿井"地道feel的感覺，仲發現九記附近，竟然有三間我和E已計劃試菜的食肆，咁下次就唔駛再望地圖搵了（如果仲記得條路的話...）．

臨分開時，我同E講："今晚我地第三次行過LV Flagshop門口了！"（證明我地的確係兜錯過路的）

平均消費＝HKD35/person

@@@
九記牛腩
中環歌賦街21號地下
28150123/28505967