麵屋一平安@美麗華

還是下著雨，本想到南山谷，但要在2030前交檯，不能好好的暢談，結果只好另覓好地方．最後來到美麗華近諾士佛臺的一間日本餐廳．名字十分有趣，內裡佈置是典型的日本酒吧，天花板的三條鯉魚夠哂搶眼．

講番 d 食物，先前在 Starbuck 食左野的緣故，所以兩個人只點了三道菜：炸八爪魚軟骨（但實情八爪魚有骨的嗎？）特製什錦拉麵同埋串燒三文魚．

炸野向來都好好食，香口嘛，這個新口味也不錯，好有咬口．

拉麵有基本的半開蛋，日本叉燒, 紫菜,仲有一款呢間舖好出名的豬腩肉，面有一層半透明的脂肪，食落去滑而不膩．一試難忘！豬骨湯底好濃，都幾重麵豉味．

串燒三文魚係我的推介，外面脆卜卜，一咬就出哂魚油，呢個整法絕對係成功地封住 d 三文魚汁，原汁原味，連對食好有要求的 J 都讚不絕口．

小休片刻，跟 J 談談離開舊公司後的近況．J 是我舊公司的同事，不論是以前還是現在，跟 J 一起就有種一見如故的感覺，仲記得以前在公司，我和 J 就似孖公仔咁，最叻就係傻笑．後來大家先後 quit，各有不同的發展，幸好，大家現在都很好．

見肚子還有一點空，點了兩個雪糕．J 的柚子雪糕好香柚子味，好似平時經常飲的柚子蜜咁，面頭仲有一粒粒柚子，食落似雪葩．我的綠茶味也不錯，好滑好香．

好滿足，幸福的感覺就係咁簡單．

＠＠＠
麵屋一平安
尖沙咀金巴利道1號諾士佛階第2層11號（可由美麗華商場電梯上2樓）
27224826